Објектот е подигнат меѓу двете светски војни, најверојатно во 1924 година. Дело е на архитектот Борис Дутов од Белград. Автор е на повеќе објекти во Скопје од тој период. Вила Тина во Гевгелија се разликува од се она што како негово дело е изведено во Скопје. Овој тип на градба е со сутеренско приземје и кат. Не излегува директно на главната улица, туку е конципиран како градска вила со дворна површина во предниот дел. Челната фасада е решена на тој начин што особено е нагласен катот (со оглед на тоа што приземјето е сутеренско) на кој од десната страна има пространа тераса до која водат ѕидани скали. Овој објект е приватен, прогласен за споменик на културата. Се наоѓа на главната улица на Гевгелија блиску Железничката станица.