Свети Константин и Елена — главна селска црква во гевгелиското село Мрзенци. Црквата се наоѓа во јужниот дел од селото и е сместена на рид со доминантна положба во однос на остатокот од селото. Според сеќавањето на мештаните и преданието, првичната црква се наоѓала на друго место, односно од другата страна на железничката пруга изградена во XIX век. Нејзин градител бил Андон Китанов со потекло од с. Тресонче. Денешната црква започнала да се гради во 1925 година, но поради низа непогодности не била довршена сè до 1936 година, кога и била осветена од страна на штипскиот владика Симеон Злетовско-струмички.