Католичката црква моментот на појавата на првите верници го создала во времето на македонската преродба во шеесеттите години на 19 век како резултат на отпорот кон Патријаршијата и нејзиното елинизаторско делување. За прв унијатски свештеник бил поставен Даниел Мирчев, кој служел во Сеово, а од 1884 год. и во Гевгелија. Во Гевгелискиот регион голема дејност развиле отец Јосиф Алоати и неговата сестра Еврозија., кои основале унијатски манастир во село Паљурци во кој имало меѓудругото и ред на сестрите ефхаристинки. Тие во 1901 отвориле сестрински дом во Гевгелија во приватна куќа на Глигор Ичев, а потоа во адаптирана куќа на некој дедо Марко се до 1911 год. Во таа година била купена куќата на Андонови и прилагодена за сестрински дом и за училиште во кое предавале сестрите на македонски јазик. Унијатите се повеќе го добивале името католици, а како носител на католичкото делување е домот на сестрите ефхаристинки и црквата „Свети Петар и Павел“.