Започнува изградбата на рекреативен центар „Динќут“ во Гевгелија

Проектот претставува интегрално партерно решение во рамките на локацијата што подразбира усогласување на содржините за спорт и рекреација, забава, одмор и слично. Бидејќи се работи за локација со брдовита конфигурација и густа зимзелена шума, водено е сметка изгледот да одговара на околината, но и да бидат употребени материјали кои ќе бидат отпорни на надворешни влијанија и забот на времето. Самото партерно уредување на овој простор и збогатување со содржини би требало да има за цел привлекување на посетители кои би дошле овде заради забава и рекреација посебно во топлите летни денови.

Проектите ги опфаќа следните содржини за забава, рекреација и спорт: Летно кино; Простор со справи за фитнес и гимнастика; Детско игралиште со современа опрема; Вештачка карпа за искачување; Игралиште за мал фудбал; Детско игралиште со опрема од природни материјали; Трим патеки со вкупна должина од околу 1082 метри.

Со проектот предвидено е поставување урбана опрема: канделабри, клупи, корпи за отпадоци, информативни табли и чешми; Поставување на 3 летниковци со маси и клупи целосно од природни материјали, вклопени во конфигурацијата на теренот.

Со овие нови содржини во овој локалитет би требало да се зголеми посетеноста на локалното население, но и од туристи надвор од општината и неговата реализација придонесува за негување на спортско-рекреативниот дух на локалното население.